في هذي التدوينه بـ أكتب عن تجربة أعتبرها جريئه وجباره بنفس الوقت وهي
"الديتوكس الإلكتروني "
التكنولوجيا اجتاحت عالمنا بشكل سريع ومخيف ، ما راح ننكر فائدتها ولكن بنفس اللحظه ماراح نتجاهل ضررها ..من منظوري للتكنلوجيا اعتبرها مشابهه للبحر !
ايه نعم تشبه البحر .. مثل الوقت اللي تكون فيه ع الشاطي وتستمتع بالامواج شوي شوي تلاقي نفسك دخلت للبحر من دون ماتحس على نفسك ... هذا حالنا بالضبط مع وسائل التواصل الاجتماعي !
اللي يفرق بين شخص والثاني هي " متى راح ينتبه لنفسه إنه صار غريق فيه او لا ؟"
لو خرجنا من دائرتنا اللي نعيشها و شفنا أنفسنا كيف أنغمسنا في التواصل بشكل مخيف !
وسائل تواصل لكنها بالواقع قطعت كل وسائل التواصل اللي بيننا وبين انفسنا وبيننا وبين اهلنا ..
التسويف والمماطله اللي اغلبنا عايشها سببها الأنترنت !
كلنا نعرف وش يعني ديتوكس و الجديد هنا انه ديتوكس للعقل والوقت وحياتنا بشكل عام !
انا خوضت هذي التجربه لأول مره بحياتي في بداية 2017 🏅*
كانت من أعظم التجارب وأجملها وأكثر تجربة أثرت فيني بشكل إيجابي
في البدايه [ كانت علاقتي بالنت ووسائل التواصل الاجتماعي قوية جدا واعتبر مدمنه !!
ايه نعم .. لان %80 من وقتي عليه !
كنت متخوفه أني راح أنجح ، ولكن اللي ساعدني هو " حُب التجربة " وكذلك كلام أبوي بأنه عالم أفتراضي وممكن مثل ما دخل بلحظه لحياتنا راح يصير الوقت اللي ينتهي فيه ؟
في 2017/1/1 حذفت كل برامج التواصل وصار جهازي لأستقبال الأتصال فقط والواتس لانه ضروري ولا يعتبر من ضمن البرامج اللي امجدها واحبها ابدآ ! بالعكس اعتبره نفس الرسايل النصيه استخدمه للضروره *-
في هذي الفتره كُنت ما احب القراءة ولا تصالحت معها بأي شكل كان .. اول يوم كان غريب شوي بحيث أني ماتأقلمت على الفكره وكل شوي امسك الجوال وانصدم بالفراغ ومحدودية البرامج وارجع اقفله
كان أعظم شي لامسته من التجربه وأول شي حسيته هو كمية الفراغ والوقت الكبير اللي موجود بيومي !!!
أنصدمت أني كنت كل هالوقت اقضيه بعالم أفتراضي !!
كان اول يومين بمثابة الشخص اللي كان اعمى وصار يشوف العالم !
ثالث يوم بدأت اخذ كتاب واقرأه وفعلا لقيت نفسي انغمست بالقراءة بمتعه وخفه ... وانتهيت من الاول ورحت للثاني 📚♥️
[ وكأني اكتشفت نفسي الحقيقيه واكتشفت حُبي للقراءة اللي كنت اعتقد أني ما احبها بسبب انشغالي بالبرامج .
لامست اشياء كثيره وانجزت اشياء أكثر واكثر من اي وقت مر علي قبل هالتجربه ؟
الشي اللي انا أعتبره هدف من الديتوكس واللي الحمدلله اللي قدرت احققه هو [ اني اشوف النعم والاشياء اللي عندي ...بشكل ابسط
"القناعه"
اللي احنا فقدناها بسبب مقارنتنا بغيرنا من اللي نتابعهم ، فعليا اقتنعت بحياتي وبكل اللي عندي والاغرب أني لاحظت بعض المقتنيات وحسيت وكاني للمره الاولى اللي الحظ وجودها ووصلت لمرحلة الاستمتاع بكل لحظه من يومي مع اهلي وحتى لوحدي ، تعرفت على نفسي بشكل حقيقي وعرفت انا كيف افكر وش اللي يأثر فيني وكيف انا افسر الامور وكذلك اكتشفت شغفي للقراءة و جددت شغفي للكتابه بالمذكرات اليوميه ' كان الوقت اللي انا عشته في هذي التجربه رتب اشياء كثيره بداخلي ، ورتب اولوياتي في الحياه ... كانت هذي التجربه بمثابة الغرفه اللي مكركبه جدا وماتلاحظ اي قطعه فيها من قوه الفوضى !! والحال اللي وصلته بعدها يشبه الغرفه بعد الترتيب [ قدرت الاحظ وجود كل الاشياء بحياتي وقدرت اعرف وش كثر انا محظوظه وفيه اكثر بكثير من اللي اتمنى بس ماكنت اشوفه للاسف !]
الاهم أني قدرت اكون بعد هالتجربه "أنسانه قنوعه " الى حد ما ..
كان هذا اول مره اجرب فيها الديتوكس لكنه ما كان المره الوحيده لاني بسبب النجاح والفايده العظيمه اللي لامستها في هالتجربه قررت بين كل فتره والثانيه اعيدها وبالفعل من وقتها للان وانا اعيد الديتوكس .. مع اختلاف المده حسب تعلقي وتأثري ! يعني لما الاحظ على نفسي تعلقي وانغماسي بدون تردد أعمل الديتوكس الالكتروني كـ تهذيب للنفس ...
اللي اتمناه من كل شخص يمر على التدوينه أنه يعطي نفسه فرصه لتجربة الديتوكس لأنه والله شي عظيم وفوائده اكبر من اللي كتبت ...
ما كتبت مده معينه لان لكل شخص اسلوب ونمط معين يعيشه لذلك تركت مساحه لكم تقررون فيها كيف تخوضون هالتجربه باللي يناسب حياتكم وظروفكم ...
دمٌتم بـ حٌب 🏅
2 Comments
شفت كثير في مواقع التواصل الاجتماعي خاصة من الأجانب يسوون هذه التجربة وكنت مرررة متحمسه أسويها لكني "لهيت" وبعد ما قرأت تدوينتك الآن أحس رجع فيني شعور الي أحتاج أترك هذي الملهيات، أحتاج أركز، وعلى الرغم من أني ما استخدم الجوال كثير وعادة أتركه في الغرفة لما بجلس مع أهلي أو قريباتي إلا أني في بعض الأحيان أتهرب من أعمال بأني أتصفح!
ردحذفتجربة جميلة شكرًا لمشاركتها معنا ..��✨
شكرا لمشاركتك تجربتك مررة محتاجه اشوف الناس كيف عاشوا هالتجربة عشان اتشجع وكلامك محفز ماشاءالله
ردحذف